ಸಿರುಗುಪ್ಪ : ಹಲವಾರು ಹಗರಣಗಳೊಂದಿಗೆ ಭ್ರಷ್ಟಾಚಾರವನ್ನೆಸಗುವ ಮೂಲಕ ಸೋನಿಯಾ ಗಾಂಧಿ ಬೇಲ್ ಮೇಲೆ, ರಾಹುಲ್ ಗಾಂಧಿ ಬೇಲ್ ಮೇಲೆ, ಡಿ.ಕೆ.ಶಿವಕುಮಾರ್ ಬೇಲ್ ಮೇಲೆ ಹಾಗೂ ಅರ್ಕಾವತಿ ಡಿನೋಟಿಪಿಕೇಶನ್, ರೈತರ ವಿದ್ಯುತ್ ಪಂಪ್‌ಸೆಟ್‌ಗಳನ್ನು ಮಾರಿಕೊಂಡ ಸಿದ್ದರಾಮಯ್ಯ ಬೇಲ್ ಮೇಲೆ ಇರುವ ಭ್ರಷ್ಟರೆಂದು ರಾಷ್ಟ್ರೀಯ ಅಧ್ಯಕ್ಷ ಜಗತ್ ಪ್ರಕಾಶ್ ನಡ್ಡಾ ಅವರು ಆರೋಪಿಸಿದರು.
ನಗರದ ತಾಲೂಕು ಕ್ರೀಡಾಂಗಣದಿಂದ ಮಹಾತ್ಮ ಗಾಂಧೀಜಿ ವೃತ್ತದವರೆಗೂ ಬಿಜೆಪಿ ಪಕ್ಷದ ರೋಡ್ ಶೋ ನಡೆಸುವ ಮೂಲಕ ಬಿಜೆಪಿ ಅಭ್ಯರ್ಥಿ ಎಂ.ಎಸ್.ಸೋಮಲಿಂಗಪ್ಪ ಪರ ಮತಯಾಚಿಸಿದ ಅವರು ನೆರೆದಿದ್ದ ಅಪಾರ ಕಾರ್ಯಕರ್ತರನ್ನುದ್ದೇಶಿ ಮಾತನಾಡಿ ವಸತಿ ಶಾಲೆಗಳು, ಕಾಲೇಜುಗಳು, ನೀರಾವರಿ ಯೋಜನೆ, ಸೇತುವೆಗಳ ನಿರ್ಮಾಣದಂತಹ ಬೃಹತ್ ಯೋಜನೆಗಳ ಮೂಲಕ ತಾಲೂಕಿನ ವಿಕಾಸಕ್ಕೆ ಶ್ರಮಿಸುತ್ತಿರುವ ಅಭಿವೃದ್ದಿ ಹರಿಕಾರರಾಗಿರುವ ಸೋಮಲಿಂಗಪ್ಪನವರನ್ನು ಮತ್ತೊಮ್ಮೆ ಗೆಲ್ಲಿಸುವಂತೆ ಮತದಾರರಲ್ಲಿ ಮನವಿ ಮಾಡಿದರು.
ಭ್ರಷ್ಟಾಚಾರ ಹಗರಣಗಳ ಸರಮಾಲೆಯ ಕಾಂಗ್ರೇಸ್ ದೇಶದಿಂದ ಮುಕ್ತವಾಗಬೇಕಿದೆ. ಅವರ ಪ್ರಣಾಳಿಕೆಗಳನ್ನೊಮ್ಮೆ ಗಮನಿಸಿ ಬಂದುಗಳೇ ಡಬಲ್ ಇಂಜಿನ್ ಸರ್ಕಾರದ ಸೌಲಭ್ಯಗಳಾದ ಎಸ್.ಸಿ, ಎಸ್.ಟಿ ಮೀಸಲಾತಿ, ಲಿಂಗಾಯತ, ಒಕ್ಕಲಿಗ ಮೀಸಲಾತಿಯನ್ನು ವಾಪಸ್ಸು ಪಡೆಯುವ ಪ್ರಣಾಳಿಕೆಯಾಗಿದೆ.
ದೇಶದ್ರೋಹಿ ಸಂಘಟನೆ ಪಿ.ಎಫ್.ಐಯನ್ನು ನಮ್ಮ ಸರ್ಕಾರ ಬ್ಯಾನ್ ಮಾಡಿದ್ದನ್ನು ನೆಪವಾಗಿಸಿಕೊಂಡು ಬಜರಂಗದಳ ಬ್ಯಾನ್ ಮಾಡಲು ಮುಂದಾಗಿದೆ. ಆದ್ದರಿಂದ ದೇಶದಲ್ಲಿ ಕಾಂಗ್ರೇಸನ್ನು ಬ್ಯಾನ್ ಮಾಡಬೇಕೆಂದು ಕರೆ ನೀಡಿದರು.
ಸೋಮಲಿಂಗಪ್ಪರನ್ನು ಗೆಲ್ಲಿಸಿ ಡಬಲ್ ಇಂಜಿನ್ ಸರ್ಕಾರಕ್ಕೆ ಬೆಂಬಲ ನೀಡಿದರೆ ಬಿ.ಪಿ.ಎಲ್ ಕುಟುಂಬಕ್ಕೆ ೫ಕೆ.ಜಿ. ಅಕ್ಕಿ, ೫ಕೆ.ಜಿ ಸಿರಿದಾನ್ಯದ ಜೊತೆಗೆ ೧ಕೆ.ಜಿ ಉಪ್ಪು ನೀಡಲಾಗುವುದು. ಮುಂದಿನ ದಿನಗಳಲ್ಲಿ ತಾಲೂಕಿಗೆ ಇಂಜಿನೀಯರ್ ಕಾಲೇಜ್ ಬರಲಿದೆಂದು ತಿಳಿಸಿದರು.
ಇದೇ ವೇಳೆ ಅಭ್ಯರ್ಥಿ ಎಂ.ಎಸ್.ಸೋಮಲಿಂಗಪ್ಪ, ಜಿಲ್ಲಾಧ್ಯಕ್ಷ ಮುರಾರಿಗೌಡ, ವಿವಿಧ ಮೋರ್ಚಾಗಳ ಪದಾಧಿಕಾರಿಗಳು, ಕಾರ್ಯಕರ್ತರು ಇದ್ದರು.
