ಆರೋಗ್ಯ ಇಲಾಖೆಗೆ 16 ಬಾಡಿಗೆ ವಾಹನಗಳ ಅಗತ್ಯ ನವೆಂಬರ್ 14ರೊಳಗೆ ಅರ್ಜಿ ಸಲ್ಲಿಸಲು ಆಹ್ವಾನ
ರಾಯಚೂರು ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯ ರಾಷ್ಟ್ರೀಯ ಆರೋಗ್ಯ ಅಭಿಯಾನದಡಿ ಕಾರ್ಯನಿರ್ವಹಿಸುವ ರಾಷ್ಟ್ರೀಯ ಬಾಲ ಸ್ವಾಸ್ಥ್ಯ ಕಾರ್ಯಕ್ರಮ (RBSK) ಹಾಗೂ ಜಿಲ್ಲಾ ಕಾರ್ಯಕ್ರಮ ಅನುಷ್ಠಾನ ಘಟಕಗಳ ಕಾರ್ಯಚಟುವಟಿಕೆಗಳಿಗೆ ಚಾಲಕ ಸಹಿತ ಬಾಡಿಗೆ ವಾಹನಗಳನ್ನು ಒದಗಿಸಲು ಅರ್ಹ ಹಾಗೂ ಆಸಕ್ತ ಸಂಸ್ಥೆಗಳು ಮತ್ತು ವಾಹನ ಸರಬರಾಜುದಾರರಿಂದ ಅರ್ಜಿ ಆಹ್ವಾನಿಸಲಾಗಿದೆ.
ರಾಷ್ಟ್ರೀಯ ಬಾಲ ಸ್ವಾಸ್ಥ್ಯ ಕಾರ್ಯಕ್ರಮದಡಿ ವಿವಿಧ ತಾಲೂಕುಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಆರ್‌ಬಿಎಸ್‌ಕೆ ತಂಡಗಳ ಸಂಚಾರಕ್ಕಾಗಿ ಒಟ್ಟು 12 ವಾಹನಗಳ ಅಗತ್ಯವಿದೆ. ಈ ಪೈಕಿ ರಾಯಚೂರು ತಾಲೂಕಿಗೆ 4, ದೇವದುರ್ಗ ತಾಲೂಕಿಗೆ 2, ಮಾನವಿ ತಾಲೂಕಿಗೆ 2, ಲಿಂಗಸುಗೂರು ತಾಲೂಕಿಗೆ 2 ಹಾಗೂ ಸಿಂಧನೂರು ತಾಲೂಕಿಗೆ 2 ವಾಹನಗಳನ್ನು ಒದಗಿಸಬೇಕಾಗಿದೆ. ಇದರ ಜೊತೆಗೆ ಜಿಲ್ಲಾ ಕಾರ್ಯಕ್ರಮ ಅನುಷ್ಠಾನ ಘಟಕಗಳ ಬಳಕೆಗಾಗಿ 4 ವಾಹನಗಳ ಅಗತ್ಯವಿದ್ದು, ಒಟ್ಟಾರೆ ಚಾಲಕರ ಸಹಿತ 16 ವಾಹನಗಳನ್ನು ಒಂದು ವರ್ಷದ ಅವಧಿಗೆ ಬಾಡಿಗೆ ಆಧಾರದ ಮೇಲೆ ಪಡೆಯಲು ಇಲಾಖೆ ನಿರ್ಧರಿಸಿದೆ.ವಾಹನಗಳು ಹಳದಿ ನೋಂದಣಿ ಫಲಕ ಹೊಂದಿರುವ ಎಸಿ ಟ್ಯಾಕ್ಸಿಗಳಾಗಿರಬೇಕು. ಟಾಟಾ ಇಂಡಿಗೋ, ಇಂಡಿಕಾ ವಿಸ್ಟಾ, ಜೆಸ್ಟ್, ಬೊಲೆರೊ, ಟಾಟಾ ಸುಮೋ, ವೆರಿಟೊ, ಸ್ವಿಫ್ಟ್ ಡಿಸೈರ್ ಟೂರ್, ಎರ್ಟಿಗಾ ಅಥವಾ ಇದೇ ಮಾದರಿಯ ವಾಹನಗಳನ್ನು ಒದಗಿಸಬಹುದಾಗಿದೆ. ವಾಹನಗಳು 2022ನೇ ಸಾಲಿನ ಅಥವಾ ತದನಂತರದ ಮಾದರಿಯಾಗಿರಬೇಕು.
ಆಯ್ಕೆಯಾಗುವ ವಾಹನಗಳು ಚಾಲಕರೊಂದಿಗೆ ಲಭ್ಯವಿರಬೇಕು. ಪ್ರತಿ ತಿಂಗಳು ಗರಿಷ್ಠ 2,500 ಕಿಲೋಮೀಟರ್‌ವರೆಗೆ ಸಂಚರಿಸಲು ಅನುಕೂಲವಾಗುವಂತೆ ವಾಹನಗಳನ್ನು ಒದಗಿಸಬೇಕಾಗುತ್ತದೆ. ಆಸಕ್ತ ಹಾಗೂ ಅರ್ಹ ಸಂಸ್ಥೆಗಳು ಮತ್ತು ವಾಹನ ಸರಬರಾಜುದಾರರು ಅಗತ್ಯ ದಾಖಲೆಗಳೊಂದಿಗೆ ನವೆಂಬರ್ 14ರೊಳಗಾಗಿ ಅರ್ಜಿ ಸಲ್ಲಿಸಬಹುದಾಗಿದೆ.
ಈ ಕುರಿತು ಹೆಚ್ಚಿನ ಮಾಹಿತಿ ಮತ್ತು ಅರ್ಜಿ ಸಲ್ಲಿಸುವ ವಿಧಾನಕ್ಕಾಗಿ ಕರ್ನಾಟಕ ಸರ್ಕಾರದ ಅಧಿಕೃತ ವೆಬ್‌ಸೈಟ್ https://karunadu.karnataka.gov.in https://karunadu.karnataka.gov.in ಹಾಗೂ ರಾಯಚೂರು ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯ ಜಿಲ್ಲಾ ಯೋಜನಾ ನಿರ್ವಹಣಾ ಘಟಕವನ್ನು ಸಂಪರ್ಕಿಸಬಹುದಾಗಿದೆ.ಈ ಕುರಿತು ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯ ಸದಸ್ಯ ಕಾರ್ಯದರ್ಶಿಗಳು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
